10.03.2025
Unsere Zettel vo dr Fasnacht 2025
70 Joor uff der Gass
Sibzig Joor, das isch ächt grass,
sinn mir Zupfer scho uff der Gass.
Uff vier Reeder in orange und grien,
wo mir Jung und Alt unterhalte dien.
1955 sinn d’Rieblizupfer entstande,
uss ere Hampfle Frinde, Koleege und Verwandte.
Ob Handwärker oder Diräggter, alli sinn gäärn gseh,
uff em Waage sinn mir Frinde, gniesses syt eh und je.
Aggdivi, Ehemoligi und Binggis mache mit,
daas isch speziell das Joor, e grosse Hit.
E riisige Zug, e mächtigi Bracht,
zämme mit der Gugge sinn mir e Macht.
D’Faasnacht isch Kulturerbe worde.
Vieli Touriste kemme vo Süde und Norde.
Do kasch kräftig intregiere, lut schreie,
denn gheersch nur, ee «Waagiis» los ebbis gheie.
A propos Kulturerbe, das wänn mir no saage,
isch s Verhalten vo der Regierig nit z’ertrage.
Es wird immer alles dyyrer, kasch’s kuum meh finanziere,
vo ihne kei Understitzig, muesch alles sälber organisiere.
Bisch im Kopf inne eebe nid ganz hell.
Bisch ab und zue au e weenigli kriminell.
Mach dir kei Sorge, blyyb eifach dra,
eso wirdsch sicher Präsidänt vo der USA.
E paar Rakete und en Elektrokarre ha,
vieli PS und e grossi Schnuure näbedra.
Bitcoin oder Doller, Milliaarde miens syy,
denn bisch bim Trump sicher derbyy.
Hesch rostigi Panzer, keini Drohne wo fliegen.
Digitali Syschteem wo sie nit z’laufen griegen.
D’Nato wo kei Munition meh kaufe will,
denn wird’s pletzlig «am Härd» saumässig still.
Hesch keini Hose, legsch eifach e Reggli aa.
Passt dir d’Frisur nit, kasch e rosa Berrige ha.
Wenn nit die geeigneti Toilette findisch, ojee,
denn gosch eifach z’Basel an der ESC.
Bisch grien, denn issisch sicher vegan,
wäge CO2 reisisch niene aane, hesch kei Plan.
Hesch kei Stutz, Schueh mit ere kaputtige Sohle,
mach dir kein Sorge, kaschs jo eifach bi de Ryyche hole.
Rieblizupfer-Waggis Basel
22.02.2024
Unvergässlichi drei scheeny Dääg
Mir derfe uff e scheeny Fasnacht 2024 zrugg luege. Drei Dääg mit summerliche Temperature, unglaublich vill Zueschauer und 4 neie Rieblizupfer. Mir möchte uns an dere Stell bi allne bedangge wo uns am Zyschtig uff dr Kaserne e Baze ins Kässeli gäh hänn. Über dr Link unde chönne dir no e paar impressione aluege.
Do no e scheens Färsli vo unserem Aktivmitglied Adrian zur Fasnacht 2024
d Fasnacht 24 isch Vergangeheit
es het nid grägnet und nid gschneit
d Larve het passt und nid druggt
s het Lüt ka wie veruggt
die Neye hän sich au guet gmacht
öb am Daag oder in dr Nacht
nöggscht Joor dien mir jubiliere
ihr hän no e ganzes Joor zum studiere
viele Dangg fyr Spiess und Drangg
em Obmaa und im Wagechef
dangge mir fyr d Arbed bref
au im Rolli gilt dr Dangg
fyr d Gugge und dr Schnitzelbangg
im Kassier dangge fyr s organisiere
im Kasernehof hän mr nid miesse friere
i frey mi scho uf s näggschte Joor
mit Larve Goschdym und kurze Hoor